在時代風雲變色嗰一刻，呷住一啖咖啡，聽住音樂，閱讀村上春樹嘅《第一人稱單數》

（有大量劇透，請小心觀看）

2021年7月1日，一個久違嘅假期，我瞓到自然醒，梳洗之後，我用自動膠囊式咖啡機沖咗一杯咖啡，用多士爐烤咗一塊北海道純牛奶嘅多士，喺多士上面搽左少少牛油，然後坐喺我屋企嘅餐枱前面，打開我嘅電子閱讀器，打算開始睇剛剛買返嚟無耐，村上春樹嘅新短篇小說集，《第一人稱單數》。

其實三十歲以上嘅人，大部份都係睇村上春樹大嘅，而我呢，亦係其中一份子，我第一個睇嘅故仔係《麵包店再襲擊》，當時可能因為我睇過嘅故仔唔多，我覺得驚為天人，我無諗過一個故事原來可以描寫得一種感覺咁深，深到一個地步，到左而家如果我嘅雪櫃入面只係剩返啤酒同埋洋蔥，我會因為害怕諗起村上描寫嗰種「餓」嘅感覺，而衝去附近超級市場買嘢返嚟填滿個雪櫃。