鋤Dee嘅話，邊條花大D

講真，我從來無諗過，原來呢個問題有得拗。

但我今年新年，見到連登有個Post，同埋Facebook都有兩個唔同嘅Post討論緊同一個問題，於是我整理左一下思緒，我覺得個問題其實只要解釋清楚，應該無人會繼續拗落去，除非只係感情上接受唔到。

由於我怕睇到呢到嘅你，都係唔知邊條花大D，所以我要話比你聽，Dee花永遠大過煙花，無論個花係乜野。

換句話講，即係無論如何，花都係計數字先，先計最大果隻，如果一樣就計第二大果隻，直到五隻數字都一樣，先計花。

點解咁講？因為鋤D係一個遊戲，一個遊戲要好玩，需要嘅，係合理嘅規則。

係鋤大D入面，每隻牌嘅強勁程度（以下簡稱Power Rating — PR），一早就已經定好左，如果每隻我比個分佢，即係葵扇2最大，52分，而階磚3最細，1分，就可以得到下表：

咁越高分嘅牌就越勁，理論上，一副牌52隻，派4份，每份13隻，當你收到呢13隻牌之後，加埋嘅總分越高，你贏嘅機會就越高。

然後無論你用你嘅牌黎出單支、一對、三條、蛇、夫、四條、同花順都好，佢地嘅PR都唔會改變，你有一隻50分嘅梅花2 ，無論放入任何一種牌型度（主要牌啦，即係夫入面果三隻，又或者四條入面果四隻，又或者蛇最大果隻），佢都會大過一隻48分嘅葵扇煙。

咁問題返返去我地今日要講嘅「花」呢度。

如果唔係計數字，而係計花嘅話，就會出現一個情況，即係48分嘅葵扇煙，用黎組一支花，係會大過50分嘅梅花2組成嘅花。

換句話講，就係呢個遊戲明明所有牌型*都跟PR嘅，如果只有唔上唔落嘅花係唔跟嘅話，就係「唔合理」。

相反，如果花係計數字先，先計最大果隻，如果一樣就計第二大果隻，直到五隻數字都一樣，先計花嘅話，「花」呢個牌型，又會跟返PR了。

同牌同權，非常重要

其實現實世界都係咁，人類社會好難做到完全公平，但係最少，要做到同牌同權。

你派13隻牌比我，我每次拎到梅花2 ，係鋤Dee呢個遊戲入面，無論咩牌型，佢都係值50分。

咁就係公平。

如果你每次派比我，我都要再睇下自己組唔組到一兩條花，先知道D牌嘅大細分佈，個PR表會因為我果13隻牌而改變，我拎到嘅梅花2有機會因為我放左佢入條花入面，變左細過紅心煙。

咁就係唔公平。

再舉一個現實生活嘅例子：

立法會選舉，新東六席，我有一票，即係我每一票有1/6席。

DQ左一席，而果席係就係我投果席，即係話我無左一票，咁我一票變左0席。

補選返呢一席，係人都有一票，即係話大家前後有兩票，但係人地果兩票就係2/6席，我果兩票就係1/6席。

同票唔同權，我就係咁樣唔知點解比人剝奪左投票權。

咁就係唔公平，唔合理。

不過，現實世界就係咁，唔會公平，唔會合理

咁至少鋤Dee嘅時候，我地公平D，合理D丫，好唔好？

*註1：JQKA2 不能成為蛇和同花順其實有同樣問題，不過唔會產生逆轉，只係令到A嘅PR其實同2嘅距離比其他數字之間嘅距離變近左啫。