《IT狗》進步空間大到好似虛空宇宙咁廣闊

到咗2022年嘅香港，要企出嚟鬧ViuTV做得唔好，真係需要好大勇氣，因為呢個世界上面好多人其實分唔到當一個人鬧你嘅時候，究竟鬧你嗰個人係真心想你變好，定係鬧你嗰個人只係想搵你嚟出氣；講真，如果我可以開發一個AI，每次有人鬧我嘅時候，我就會知道究竟條友係咪真心想我改，我估我會發達。

唔講無謂嘢住，講返套劇，我睇咗四集，發現《IT狗》進步空間大到好似虛空宇宙咁廣闊，如果要將呢套劇改做一套合格嘅劇，令人睇得開心舒服睇完仲要有嘢可以拎走嘅話呢，我要用皮皮喺劇入面一句對白嚟形容呢個情況，就係「不如唔好Debug啦，Delete啦！」

當然，唔係真係要你Delete咗套劇佢，只係想講下個嚴重嘅程度，要有根本開始講起，目前我見到嘅角色有七個，包括：失意創業低能主角、Designer轉Programmer花瓶乙個、天才Programmer極度右傾、女權左膠、星之子、BrainCha、負能量極黑子。