如何有系統地玩 Wordle
Jan 27, 2022
近期大家都見到好多人無端端Post一啲黃色綠色黑色格仔,加埋一個數字,一個分數咁,我諗大家都知,呢個係一隻叫做Wordle嘅每日拼字遊戲。
呢隻Game乜都唔使裝,只需要撳入條Link度就有得玩,要玩嘅嘢係你估一個五個字母嘅英文字,如果唔中就係灰色,中左就綠色,齋中字母唔中位置就係黃色。
非常簡單嘅一隻Game,但係好多人都對呢隻Game有啲誤會,以為係一隻拼字嘅遊戲。
但玩左大約一個星期之後(佢每日有一個新嘅字),我就明白,呢個係一個邏輯加數學嘅遊戲,理論上,你唔需要識任何一個英文字,都可以喺六個機會之內估得到。
首先,生字入面英文字母嘅出現次數係極度唔平均嘅,呢個世界有一隻叫做Scrabble嘅拼字遊戲,佢比每個字母都有一個分數,越高分,就代表越少出現喺生字嗰度。