香港人，要學識唔好再傷害自己

陳奕迅出咗一個聲明，真真正正係「投共時開心一點不必掛念我」，咁當然大家都反應好大，喺香港，一個政客轉軚又好、做嘢又好、乜都好，「係咩踫」啦，但一個藝人，只要佢一表態，真係好大件事，牽連好廣，同埋會觸動到好多人神經。

有啲人會拎晒陳奕迅嘅CD呀、黑膠呀咁出嚟劈爛佢，仲會話以後唔聽佢嘅歌。

但我想講，咁樣，你根本傷害唔到陳奕迅，更加傷害唔到極權政府，你傷害到嘅，只係你自己。

點解呢？

因為你聽一首歌、睇一套戲，其實你係同首歌或者套戲之間產生左一種關係，中二病啲講，一種「牽絆」，而嗰種關係喺你聽到嗰首歌嘅一刻，已經同個作者/唱者/導演/演員無關。