《麥路人》 — 將所有編劇唔應該犯嘅錯都犯晒

無錯，個題目你無睇錯，《麥路人》呢套戲，佢將所有唔應該犯嘅錯都犯晒，而且唔係小心翼翼，然
後唔小心犯錯，而係成套戲一小時五十五分鐘，從不停竭，全心全意去犯晒所有寫故仔嘅大忌。

對於呢個劇本，我直頭要用黃子華講《嚦咕嚦咕對對碰》嘅句子成句送返比佢：「大佬，唔係有字就係劇本㗎！」

1. 敍事角度

一個故事，你需要一個敍事角度，需要一個視點、一個主角去比觀眾去體驗果個世界，去經歷佢嘅故事；最簡單而又穩陣嘅做法，當然係跟實個主角，一步一步咁行落去，即係《鹿鼎記》咁，鏡頭入面基本上永遠都有韋小寶，如果無嘅話，一定有對劇情好重要嘅嘢要講，先會將個敍事角度抽離個主角，但時間唔會太耐，亦唔會搶走主角嘅鋒芒。